Ik’el ta muk’ul tsobajel ta yual Octubre

Oxlajuneb yu’un septiembre yabilal cha’mil xchi’uk vuklajuneb

Steklumal bats’i vinik antsetik ta Mexiko

Vinik antsetik “concejaletik” yu’un “Concejo Indígena sventa Gobierno”

Ta sventa ti jech lok’ chapal k’op ti ta Muk’ul tsobajel yu’un ti Congreso Nacional Indigenae (CNI) ta sk’ak’aliltak vakib xcha’vinik, vukub xcha’vinik xchi’uk ta vaxakib xcha’vinik yual mayo ta sjabilal cha’mil xchi’uk vuklajunebe, ja’ ti ak’o yich’ pasel yan velta ta ach’ ti Muk’ul tsobajel ta sjunul jteklumaltik Mexikoe ta yual octubre ta slumal Chiapa ta yosilal zapatistaetik; ja’yo ti jteklumunkutike, nacionunkutike, tribuunkutike, barrioetik xchi’uk bats’i vinik antsetik ti nitilunkutik ta CNI, ta xkalbe jbatik ti jayibutik slumal bats’i vinik antsutike, ak’o jva’an jtek’anantik kaj delegadotik, jdelegadatik, sventa jts’aktik batel ti jbetike, ti bu kalojtik xa’oxe.

Jech k’u cha’al jna’ojtik ti:

    1. Oyik ta spojel ti kosil jbanamiltike, oy ti majel ti milele, oy ti net’uele xchi’uk ti la’banel ta stojolal ti jteklumaltike, mu xpaj-o, kapal yantik to jujuntik k’ak’al ta stsatsub ti vokole, mu’yuk xa xi’el k’exlal cha’ayik ti k’usi tspasbutike, pe kalojbe ko’ontontik ta jmoj ti k’usi ta jpastik ta skoj ti uts’intaeletike, ja’ ti ak’o jtsob-jbatike, ak’o jtsinan jol ko’ontontik, xchi’uk ak’o kaltik ta jamal ti k’usi jnopojtike.
    2. Ti Concejo Indígena yu’un Gobierno sventa Mexikoe, stsakoj yipal ta sventa ti yabtelik ti jteklumetike, nacionetike xchi’uk tribuetik, yu’un ti k’u kepaltik ta jkotoltik ti bats’i vinik antsutik ta sjunul jteklum Mexikoe,  ja’ xa yepal ti k’otem ta ko’ontontik ti li’ xanubale, jech o xal la jkaltik ti chi j-abtejutik ta jnopben jtuktik, la jkaltik ti ta jvok’tik ta balun tsop ti abtele, ja’yo ta xkik’tik skotol ti jteklumetik nakalik ta te’tike xchi’uk ti jayibik nakalik ta lumetike, sventa ak’o jtsob-jbatik ta spajesel ti k’op stik’ojbutik-talel ti boch’otik ech’em svu’elik skuyojike.
    3. Ti CNI xanovenutik-talel ta jmoj, jech k’ucha’al jbats’iltik sjalel koman koltaumbail ku’untike, jech ti jayibutik ti pek’el oyutik ya’eluke, jbats’iltik sjalel ya’eluk sventa ak’o pasuk ta ach’ ti jlumaltik Mexikoe, xchi’uk ti ach’ banamil chtun ku’untike.

 

  • Ti yu’un sta xa sk’ak’alil nichimaj ti jteklumutike, jech ti ka’yej jlo’iltik ti ja’ skats’oj ta yalel ta muyel xcholel slo’iltael ti xk’uxul svokol ti jteklumaltik Mexikoe, xchi’uk yalel ti lekilal utsilale xchi’uk xkuxlejal ti jteklumaltike, ti ja’ kajal ta sba ta yak’ol ti CIG, jech ak’o snikesik ti banamile:

 

Ja’ yo jech o xal u, yu’un me chi ik’vankutik ta

Muk’ul tsobajel ta sjunul jlumaltik Mexiko sventa chi j-abtejutik xchi’uktik ti Concejo Indigena yu’un Gobiernoe xchi’uk ti jteklumetik ti nitilik ta Congreso Nacional Indigenae.

Ja’ ta xk’ot sk’ak’alil ta buluchib k’alal ta balunlajuneb yu’un octubre ta yabilal cha’mil xchi’uk vuklajuneb ta yosilal zapatistaetik ta Chiapa, xi cholbil ti abtelaletike:

  • Buluchib yu’un octubre: Vulebal xchi’uk stsakel ta vun sbiik ti delegado, delegadaetik yu’un ti jteklumetik nitilik ta CNI, xchi’uk ek’ xtok ti concejaletik yu’un ti GIG. Te ta sna sk’uleb  CIDECI-UNITIERRA, te ta Jobel, slumal Chiapa.
  • chab yu’un octubre: Sjamel muk’ul tsobajel xchi’uk yalel-snopel, ta jujuvok’ ti balunkoj abtelaletik sventa ti GIGe. Te ta sna sk’uleb CIDECI-UNITIERRA.
  • Oxlajuneb yu’un octubre: Slajeb k’op ti abtel ta jujuvok’e xchi’uk abtel ta moj xa tsobolutik. Te ta sna sk’uleb CIDECI-UNITIERRA.
  • Ta chanlajuneb k’alal ta balunlajuneb yu’un octubre: Xanubal ta yosilal Chiapa, ja’ xchapanojik ti jnaklumetik zapatistaetike sventa ba jk’eltik-jvu’lantik ti CIG, xchi’uk ti yaj me’-k’opolti’e.
  • Balunlajuneb yu’un octubre: Slajebal k’op ti muk’ul tsobajel ku’untike.

Ta jk’anbetik ti delegadoetike, ak’o yalik no’ox ta anil ti me chtalike, ak’o sts’ibtaik talel ta ik’ ta tok ta: catedrajuanchavez@congresonacionalindigena.org

Ti tsobajel ta sk’ak’alil lajchab xchi’uk oxlajuneb yu’un octubree, ja’ no’ox sventa stukik ti delegadaetik yu’un ti CNI, xchi’uk ti concejaletike yu’un ti CIG, jech xu’ ch-ochik no’ox ta sk’elel, ya’yel ti vinik antsetik ti me yu’un ik’bilik yu’un ti boch’otik oy yabtelik ta stijel-sk’elel k’ux-en chbat ti abtel yu’un ti CIG.

Ti yaviltak xchi’uk sk’ak’aliltak ti xanubal ta chanlajuneb k’alal ta balunlajuneb yu’un octubree, xchi’uk ti smantalil k’ux-elan xu’ chbatik ek ti boch’otik mu’yuk yabtelik ta sventa ti CIG xchi’uk me mu’yuk nitilik ta CNI, o me yu’un ik’bilike, ta xich’ nopel k’uxi chich’ pasel, me chape, ja’ ta xak’ ta a’yel ti Comisión Sexta yu’un EZLN.

 

KOLAVALIK LA’ VA’YIK KA’YEJTIK

Ta sk’ak’alil 10 yu’un septiembre ta yabilal cha’mil xchi’uk vuklajuneb.

Ta sventa ak’o Jcha’va’an tek’antik ti Jteklumaltike.

Manchuk xa mu’yukuk tsakbilutik ta muk’ ti ta jteclumaltik Mexikoe

Muk’ul tsobbail yu’un bats’i vinik ants ta Steklumal Mexiko.